Peiriant Vestas 75kW yw tyrbin gwynt cyntaf Ynni Adnewyddadwy Cymunedol Bro Ddyfi (BDCR), a brynwyd yn ail law a’i osod yn 2003 ar y bryn uwchlaw Canolfan y Dechnoleg Amgen, ger Machynlleth, Cymru.
Yn wreiddiol, roedd y tyrbin yn cyflenwi CDA, a’r ynni dros ben yn mynd i’r rhwydwaith ddosbarthu ynni leol. Ar hyn o bryd, mae’r holl ynni’n mynd i’r grid.
Cafodd y tyrbin ei osod ac roedd yn eiddo i 55 cyfranddaliwr arloesol BDCR.
Talwyd am gyfran o’r cyfranddaliadau gan grant gan yr Ymddiriedolaeth Arbed Ynni. Mae’r elw o’r cyfranddaliadau hyn yn mynd i gronfa ynni cymunedol sy’n cael ei gweinyddu gan ecodyfi i ariannu mesurau effeithlonrwydd ynni ym Mro Ddyfi.
Cafwyd grantiau eraill gan Ymddiriedolaeth Ynni Gwyrdd Scottish Power a’r Comisiwn Ewropeaidd.
Mae mesuryddion yn yr is-orsafoedd sy’n cefnogi’r tyrbinau gwynt. Mae pob cilowat-awr sy’n cael ei gynhyrchu yn mynd i’r grid dosbarthu lleol trwy’r is-orsafoedd lle mae’r trosglwyddyddion wedi’u lleoli. Mae’r mesuryddion yn cofnodi’r allbwn a chaiff hyn ei anfon trwy linell ffôn bob hanner awr i Ofgem. Mae hyn yn cael ei ddefnyddio i gyfrifo’r taliad rydym yn ei dderbyn am yr ynni bob mis.
Rydym wedi cyfrifo’r ffigwr ar gyfer y nifer cyfatebol o aelwydydd domestig yn flynyddol ar sail defnydd trydan domestig blynyddol cyfartalog o tua 3,500kWhr, ffigwr rydym wedi’i gael o’r ffigyrau defnydd a gyhoeddwyd yng Nghrynhoad Ystadegau Ynni’r Deyrnas Gyfunol ar gyfer ardal Powys.
Rydym yn rhannu’r swm blynyddol a gynhyrchir gan gyfartaledd defnydd gan aelwydydd i gyfrif faint o aelwydydd cyfatebol fyddai allbwn y tyrbinau yn eu cyflenwi.
Mae pob kWhr o drydan glân a gynhyrchir trwy ynni adnewyddadwy yn lleihau ein dibyniaeth ar danwydd ffosil. Felly mae pob kWhr o ynni adnewyddadwy yn arwain at ostyngiad yn y nwyon tŷ gwydr a achosir gan gynhyrchu trydan trwy danwydd ffosil. Y ffigwr ar gyfer arbed carbon deuocsid rydym ni’n ei ddefnyddio yw’r ffigwr sy’n cael ei dderbyn gan y diwydiant ynni, sef arbed 275g o garbon deuocsid i bob kWhr o ynni glân a gynhyrchir.
